Tuladha Crita Cekak (Crikak) kang duweni unsur surprise

Estri kang Ilang 

            

        

gambar kadudut saking https://publicdomainvectors.org/id/bebas-vektor/Vektor-menggambar-sedih-wanita/25072.html

             Hawa ba’da subuh rasane seger, iku sing dirasakake Mas Nardi nalika mlayu-mlayu lan olahraga kangge ngelemesne otot-otote. Wayah nganggur iki, Mas Nardi arep niliki adhi kembar wadone, Maryam sing kerja dadi pelayan ing warung Padhang. Ora lali Mas Nardi gawakake hadiah marang Maryam yaiku paket dolanan Ular-Tangga sing masia Maryam wis tuwa, nanging dheweke seneng ngelumpukake dolanan-dolanan cah cilik. Ana setithik hawa sedih sing dirasakake Mas Nardi. Dina iki, resmi limang taun Mas Nardi lan Ani dadi pasutri. Ananging sing dirasakake malah sangsara.

            Telepon saka warunge Dhik Maryam muni, banjur diangkat Maryam. Ujare telepon iku kanggo Mas Nardi saka tanggane, Pak Wahyu. Maryam menehne gagang telepon menyang Mas Nardi. Maryam ora ngerti apa sing diomongne Pak Wahyu marang Mas Nardi, banjur Mas Nardi nutup telepon lan pamit mulih. Tekan omah, Mas Nardi kaget lan pikirane kemrungsung ora karuan. Meja ruang tamu wis malik, pecah, lan awut-awutan.

“ Ani.....Ani...!” Mas Nardi bengok-bengok nyeluk bojone si Ani. Ani ora semaur, ora ana sapa-sapa. Digoleki ana ing kamar, pawon lan buri omah isih ora ana. Hpne ditelfon ya ora aktif. Banjur Mas Nardi telfon menyang kantor polisi amarga saking gupuhe. Ora suwi polisi teka mara TKP. Polisi jaluk ijin marang Mas Nardi kangge nggledhah omahe. Polisi menehi garis polisi ing panggon sing sekirane nyurigakake. Banjur Mas Nardi digawa menyang kantor polisi kangge dijaluki keterangan kadadeyan mau. Ora ana sing gawe curiga pihak polisi marang Mas Nardi. Kasus iki arep ditekakne detektif supaya bisa jelas lan rampung.

Mas Nardi mulih menyang omahe si Maryam gawa pikiran nglangut. Dheweke kelingan setaun wingi, yaiku dina resmine Mas Nardi lan Ani dadi pasutri taun ke papat. Ani diajak dolan menyang perpustakaan kutha. Wong loro iku seneng banget karo buku. Saiki, kedadeyan kaya ngene kang kudu ditampa Mas Nardi. Omah anggene Mas Nardi lan Ani sementara dikosongi dhisik supaya penyelidikan sing ditumindakake pihak kepolisian lancar.

Bengi ganti isuk. Bapak lan ibune Ani saka luar kutha banjur mara menyang kantor polisi amarga kepingin ngerti apa kedadeyan sing lagi ditampa anake. Wong tuwa sapa sing ora sedhih yen ngerti anake ilang, apa neh ana curiga yen umpama si Ani diculik penjahat. Ibune uwis ora bisa ngempet eluh, banjur netes ing pipine sing uwis keriput amarga umur. Amung dunga kang bisa diucapkake saben wektu marang Gusti.

Setaun wingi pancen rumah tanggane Mas Nardi lan Ani lagi dicoba. Mas Nardi kena PHK saka kantore, lan saiki amung Ani sing bisa dadi panyangga ekonomi saben dina kaluwargane. Ananging, suwi-suwi tabungan kekuras entek mergane Mas Nardi ora ndang usaha golek pagaweyan. Bisane mung nonton tv, males-malesan ana ing kasur, mangan, banjur turu maneh. Wong wadon sapa sing ora pegel lan jengkel nyawang bojo sing kudune bisa nguripi kaluwargane malah bisane paling akeh ngentekne duit. Mas Nardi wiwit tuku barang-barang ora kangge lan malih boros. Rumangsa bojone wis bisa golek dhuwit dhewe lan mandiri, dheweke banjur amung ngatung marang si Ani.

Ing sawijining bengi, Mas Nardi arep dolan karo kanca-kancane SMA. Ananging si Ani kepingin Mas Nardi ing omah wae. Omong-omongan apa wae sing bakal dadi rencana urip keluargane. Mas Nardi ora bisa ngiyani Ani lan janjeni wektu liya. Ani tetep ngeyel, dheweke wis ora bisa ngempet apa sing dadi kepinginane sing biyen-biyen. Ani kepingin dhuweni lan momong anak. Nanging Mas Nardi panggah ora gelem nyanggupi kepinginan bojone iku amarga sing dadi masalah saiki kepiye carane urip tetep mlaku masia Mas Nardi durung duweni pagaweyan.

“ Kangmas, ngertia aku kepingin dhuweni anak” ujar si Ani

“ Kangge apa? Iku alasanmu supaya awake dhewe isih bisa dadi pasutri lan nyelametekake rumah tangga iki?” Mas Nardi nyangkal.

“ Iki dudu kangge alasan, iku sawijine rejeki paringan dening Gusti” si Ani nambahi

“ Alah kakehan omong!”

Banjur Mas Nardi emosi lan njorokne awake Ani. Bathuke Ani metu getih seger amarga ketatap lingiran meja. Ora mung getih, ananging eluh ing pipine Ani metu deres masia Ani ora ngrengek. Mas Nardi jaluk pangapura marang bojone, nanging sajake awit kuwi Ani wis keweden dhewe marang wong sing disayang iku.

Maryam nggugah lamunane Mas Nardi. Wis awit rong dina Mas Nardi nginep ning omahe Maryam. Maryam melu sedih ngerasakake larane kangmase iku. Mung bisa sabar sing diujarake Maryam marang Mas Nardi. Mas Nardi kepingin leren lan ngleremake atine. Banjur Maryam mateni lampu supaya Mas Nardi bisa turu angler.

Penyelidikan terus ditumindakake. Akhire polisi nemokake barang bukti. Ana bekas getih kaya wong bar keguguran. Banjur Mas Nardi diceluk pihak kepolisian. Mas Nardi ditakoni apa bener yen akhir-akhir iki si Ani meteng. Mas Nardi ora mangsuli amarga isih kaget karo pitakonane pihak polisi. Ananging sing dimangerteni Mas Nardi, si Ani ora meteng. Polisi malih duweni rasa curiga marang Mas Nardi. Apa Mas Nardi dhalang saka kasus iki.

Pawarta kelangan si Ani uwis ngerembet tekan endi-endi. Kalawarti akeh sing nyimpulake yen Mas Nardi kuwi dadi tersangka anggone Ani mati. Saya mrene polisi akeh nemokake barang bukti sing nunjukake Mas Nardi dadi tersangka kasus iki. Kadadeyan akeh sing gawe bukti kuat si Mas Nardi dadi tersangka wiwit saka kebongkare kasus perselingkuhan dheweke karo mahasiswane sewayah biyen nate magang dadi asisten dosen. Lan ditemokake kayu sing ana bekas getih sing dideleh ing cedhak garasi omahe. Mas Nardi wiwit ngundang pengacara kangge nuntasake kasus iki. Rumangsa awake ora nyalahi, amung kena fitnah marang kasus ilange bojone.

Wis ana sewulan Ani ngilang, lan kasus iki saya nguwati yen Mas Nardi iku pelakune. Sidang kasus iki ditumindakake. Ananging ora ana pigunane nekakake pengacara amarga vonis ukuman wis kuat. Mas Nardi kena ukuman kurungan. Banjur adhine si Maryam nangis kejer amarga ora percaya mase iku tega mateni bojone dhewe. Si ibu lan bapake Ani rumangsa jengkel amarga anak siji sing diwanthi-wanthi lan diopeni khanti dadi wong sukses banjur mati ing tangane bojone dhewe.

Seminggu banjur Mas Nardi dadi tahanan, ana sing ngabari yen Ani uwis ditemokake. Kabeh kaget karo kabar sing lagi teka iki mau. Banjur wong tuwane Ani lan Maryam mara menyang kantor polisi. Kahanane Anilemes lan ora berdaya. Ora mikir dawa wong tuwane Ani langsung gawa si Ani menyang omah sakit. Sakwise diperiksa dokter, Ani diduga wis dianiaya karo wong sing nyulik dheweke amarga ana bekas kebeler ing lengen lan pipine.

Ananging sejatine iku mung lakon lan akal buluse si Ani supaya Mas Nardi kapok ngelarani atine Ani. Wis setaun iki Ani ngerasakake sengsara marang bojone sing tumindak kasar lan selingkuh karo wong wadon liya. Ani pinter lan licik bisa ngatur TKP sing kayatha bisa anggawe Mas Nardi dadi pelakune. Kasunyatane, sewulan Ani minggat ning kutha liya nentremake atine. Dheweke ora luput marang beritane ing media tv lan koran daerahe babagan pawarta dheweke ilang. Seneng lan bungah amarga bojone si Mas Nardi bisa ngerasakake larane.

“ Kepiye kangmas rasane dumadi wong sing bejat? Ya iki hukuman sing kudu kok tampa” ujare Ani bisik-bisik marang Mas Nardi.

Mas Nardi senajan ora bisa ngempet nesu lan muntape marang Ani. Tembung pegat wis ana ing mbun-mbunan sirahe. Ananging merga Ani uwis bali, ukuman pidana lan tuduhan kabeh marang Mas Nardi mau dicabut. Mas Nardi slamet saka ukuman kurungan. Jebule, pelaku palsu penculikan si Ani wis diwangerteni ananging uwis dadi mayat. Kasunyatane, Ani sengaja mateni pelaku palsu iku sing ora liya yaiku kancane SMA. Darmin, kanca SMA sing nampung Ani sewayah minggat, malah dadi korbane. Darmin dipateni nganggo silet, ditujep gaman ing wetenge. Ani alasan marang polisi yen dheweke diculik sewulan lawase lan arep diperkosa si Darmin. Kangge mbela lan nylametake awake, si Ani kepeksa mateni Darmin.

Ani pancen wong wedok sing pinter lan misuwur ing masyarakat amarga prestasi lan buku-buku sing ditulise. Saking pintere iku mau, dheweke duweni sifat psikopat. Mas Nardi uwis ora bisa obah, dheweke amung pasrah marang lakone bojone. Uwis diwenehi urip lan kebebasan saka ukuman kurungan anggawe Mas Nardi ngucap rasa syukur. Maryam ngerasakake sedihe Mas Nardi. Ora lila yen dulur setunggale iku ngerasakake sengsara. Nanging kayatha apa si Ani tetep bojone. Bakal dadi masalah anyar yen Mas Nardi tetep jaluk pegat marang Ani. Bakal akeh masyarakat sing nuduh Mas Nardi wong lanang sing ora becik banjur kasus perselingkuhan iku mau ya uwis kesebar. Mas Nardi amung bisa ngerampungne sisa uripe karo si Ani, khanti besuk ing dina tuwa, apa wae resikone.

*rampung*